Woi Chyai Hpyen Yen Ma Shapan Jawng Ap Kyu Hpyi Hpawng Galaw

2012 July (31) ya jahpawt hkying (8:00)am aten hta Laiza Muk Lum, Woi Chyai Lawk (1) hta Woi Chyai Hpyen Yen Ma Shapan Jawng (HtuGyiNta) Ap kyu hpyi hpawng galaw ai hpe chye lu ai.

Ndai Hpyen Yen Ma Shapan ap kyu hpyi hpawng hpe makam masham hpung woi sara ni kawn woi awn ai hpang Hpyen Yen Lakawn Lanawn Komiti Ningbaw Salang Kaba Labang Doi Pisa kawn shatsam mungga jaw ya ai hta hpaji gawa hkyak dik ai re majaw hpyen yen mung shawa ni a kashu kasha ni hpaji nmai hpang hkrat ai hpe yaw shada let Hpyen Yen Lakawn Lanawn Komiti kawn Hpyen Yen Dabang shagu hta Hpaji Jawng hpewoi awn gawgap mat wana re lam hpe tsun sanglang dan ai.

Woi Chyai Hpyen Yen Ma Shapan Jawng (HtuGyiNta) hpe 27-March-2012 kawn 15-July-2012 laman masha n?gun marai (14) tup hte gawgap ai, sung lang kau ai gumhpraw Miwa Yuan (23,645) hte Kyets (399,600) re hpe chye lu ai.

Ndai Hpyen Yen Ma Shapan Jawng hta Jawng Ma marai (120), Sarama marai (6) hte 2012August (1) ya shani kawn hpawhpang mat wana re hte Laiza Muk Lum kata na Masat (1-3) Hpyen Yen Dabang na ma ni hpe hkap la nga ai lam hpe chye lu ai.

2011 June (9) ya shani KIO hte Myen Hpyen Dap ni majan byin hpang wa ai kaw nna Lai Za Muk Lum kata hte KIO Up Hkang ginra ni hta Mung shawa hpyen yen ni law law du shang wa ai re majaw hpaji naw sharin nga ai ma ni, ten n-hpang hkrat hkra KIO Hpyen Yen Lakawn Lanawn Komiti hte Ginjaw Hpaji Dap ni kawn Hpyen Yen Dabang shagu hta jawngma ni laika hpaji matut sharin lu hkra tatut woi awn nna 2012-2013 Hpaji Ladaw hta KIO Up Hkang Ginra, Mungdan ting na Hpaji Jawng hte Hpyen Yen Dabang shagu na Jawng ni hpe gumhpraw n-hta ai sha sharin ya nga ai lam hpe chye lu ai.

• < Prev
• Next >