Knet; 2009 ning October 9 ya.
Sinpraw Ginwang Ginjaw kata Gauri Krung, Kadaw Mare kaw 2009 ning January 19 ya shani kawn gaw gap hpang wa ai Shanglawt Asuya Lawu Tsang Jawng hpe 2009 ning July shata 15 ya shani jawng dingshawn shang poi galaw nna Sinpraw Ginwang Ginjaw Hpaji Dap hpe ap ya sai lam chye lu ai.
Ndai Kadaw Lawu Tsang Jawng hpe Wunpawng Garum Ningtum hte Gaw Sharawt Komiti kawn lit la woi awn galaw ai rai nna jawng hpe grai ngang kang tsawm htap ai hte jawng lang arung arai ni mung hkum hkum tsup tsup galaw jinghkum tawn da lu sai hpe chye lu ai.
Wunpawng Garum Ningtum hte Gaw Sharawt Komiti gaw Wunpawng buga ginra shagu hta gawgap lam, kanbau magam bungli lam, hkamja lam, hpaji lam, buga nam kawn hte majat wunkat amyu myu galaw nga ai lam hpe chye lu ai.
Wunpawng Karum Ningtum hte Gaw Sharawt Komiti gaw Wunpawng Mungdan Shanglawt hpung kawn lai wa sai 1987 ning hta KRRC ( Kachin Refugee Relief Committee) ngu shawng hpaw hpang nhtawm Mungdan kata majan a majaw htingbu Miwa Mungdan de hprawng yen nga ai mung shawa ni hpe hkye mawai garum madi shadaw ai lam hpe galaw hpang wa sai. 1993 hta KRC (Kachin Relief Committee) ngu galai shamying nhtawm N.G.O ni hte ta gindun nna garum ningtum madi shadaw ai lam hpe galaw lai wa sai. 1994 ning hta K.I.O Ginjaw Komiti gaw simsa lam la ngut ai hpang majan a majaw hprawng yen nga ai mung shawa ni tinang a buga ginra de bai nhtang du wa sai hte KRC Komiti hpe KRDC ngu mying bai galai nna N.G.O ni hte ta gindun let dep hkap ai buga ni hta bawng ring lam, gaw sharawt lam ni galaw nga ai uhpung re hpe chye lu ai.
