Mung Shawa, Dap Shawa shang lawm ai Mungkan AIDS ninghkap ninghtoi Laiza Muklum kaw galaw

Knet; 2009 ning December 1 ya.

2009 ning December 1 ya shani Mungkan AIDS ninghkap ninghtoi (World AIDS Day) hpe madi shadaw ai hku nna Ginjaw Hkamja Dap woi awn let Mungkan AIDS hpe ninghkap ai shamu shamawt lam ni hpe Laiza Muklum hta galaw ai lam chye lu ai.

Ndai zawn shamu shamawt lam hpe Ginjaw Hkamja Dap hte H.U Kachin Project ni woi awn let 2009 ning November 29 ya shani kaw nna ninghkap laika pa (Poster) shakap ai lam, AIDS hpe ninghkap ai laika gam shabra ai lam ni hpe Laiza Muklum kata shara shagu hta galaw wa sai.

2009 ning November 30 ya jahpawt hkying 8:00 Am aten kawn 10:00 Am du hkra Laiza Muklum, Lahta Tsang Jawng hta Hkrangpan sumla soi shingjawng ai, Ga Shagawp ka shingjawng ai, Laika kaji (Essay) ka shingjawng ai lamang ni hpe galaw wa sai. Shana hkying 3:00 Pm aten hta Ginjaw Hkamja Dap Amyu Shayi Gawdin ginsup ninghkring ni hte Laiza Muklum Amyu Shayi Gawdin ginsup ninghkring ni Gawdin ginsup shingjawng ai lamang hpe mung galaw wa sai lam chye lu ai.

2009 ning December 1 ya jahpawt hkying 5:00 Am aten hta Laiza Ramma Komiti woi awn let Sweet December Marathon kagat shingjawng lamang hpe galaw ai, jahpawt hkying 5:00 Am kawn 6:30 Am du hkra Ginjaw Hkamja Dap woi awn let Mung Shawa, Dap Shawa yawng shang lawm ai Lam hkawm shawa nsen marawn ai lamang hpe galaw ai, jahpawt hkying 7:00 Am aten hta Ginjaw Hkamja Dap hte H.U Kachin Project ni woi awn let Mungkan AIDS ninghkap ninghtoi Zuphpawng hpe Zup Awng Simsa Gawdin Pa hta galaw ai lam chye lu ai.

Ndai  hpawng hta Mung Shawa hte Dap Shawa yawng 400 daram shang lawm wa sai lam chye lu ai.  

Sweet December Marathon kagat shingjawng lamang sumla ni

Magam gun amyu shayi ni mung Marathon kagat shingjawng lawm