KIO MASAT NINGHTOI GOLF GINSUP SHINGJAWNG POI KUMHPA SHAGRAU HPAWNG

Knet; 2009 ning October 24 ya.

KIO masat ninghtoi hpe madi shadaw ai Golf shingjawng poi hta kumhpa lu ai ni hpe dai ni 2009 ning October 24 ya shana hkying 6:30 Pm aten galaw wa sai lam chye lu ai.

Kumhpa shagrau hpawng hta, KIC Ningbaw Malai (1) Lat Du Daju Jum Nban La Awng kawn sa du mungga shaga ai lam chye lu ai. Ningbaw Malai (1) shaga ai mungga hta, KIO masat nhtoi Golf ginsup shingjawng lamang hta sa du shang lawm ai ni yawng hpe kabu gara hkap tau la ai lam, 1960 ning October (25) ya shani kaw na KIO hpe hpaw masat wa ai rai nna shaning shagu masat ninghtoi lamang galaw nga ai lam, KIO gaw hpyen majan hpe n ra sharawng ai lam, ya ten hta KIO kawn tang hpyi tawn ai lam ni gaw Amyu sha ni lu la ging ai lam ni hpe sha hpyi lajin tawn ai rai nna teng man ai ahkaw ahkang lu ai rai yang laknak lang rawt malan ai lam n-galaw ra na re lam, ngwi pyaw simsa ai Munghpawm kata hta rau sha jawm nga na hpe myit mada ai lam ni tsun shana mat wa ai.

Kumhpa shagrau ai hta, ginsup hpung hku shingjawng ai hpe masat (1) kawn (5) du hkra shagrau nna, dinghkrai atsang (a) hte dinghkrai atsang (b) ngu garan let shagrau ya ai.

Ginsup hpung hku shingjawng ai hta 1st kumhpa hpe Dingda Ginwang Daw (S.Div) hpung, 2nd kumhpa hpe Mo Nyin Golf Club hpung ni, 3rd kumhpa hpe Laiza Golf Club hpung ni, 4th kumhpa hpe Awng Mai Company ginsup hpung ni hte 5th kumhpa hpe Jade Land Company ginsup hpung ni lu mat wa sai re.

Dinghkrai atsang (a) hpung hta, 1st kumhpa hpe Dingsi A Yaw (S.Div), 2nd kumhpa hpe La Ying (Mo Nyin), 3rd kumhpa hpe Salang Kaba Tang Gun (W.Div), 4th kumhpa hpe Soe Myint (Jade Land), 5th kumhpa hpe Ngwa Sa (G.H.Q), 6th kumhpa hpe Htun Tin (Bala Min Htin) ni lu mat wa sai.

Dinghkrai atsang (b) hpung hta, 1st kumhpa hpe Du Up Jum Myat Kyaw (M.P.HK), 2nd kumhpa hpe Nay Myo Shin (Mo Nyin), 3rd kumhpa hpe Brang Seng (S.Div), 4th kumhpa hpe Du Kaba Sin Wa (Laiza), 5th kumhpa hpe Du Kaba La Awng (Laiza), 6th kumhpa hpe Du Kaba Zau Tang (G.H.Q), 7th kumhpa hpe Paing Soe Win ( Jade Land), 8th kumhpa hpe Htun Tsein (Jade Land), 9th kumhpa hpe Nay Lin Awng (Mo Nyin) hte 10th kumhpa hpe Du Kaba Naw Sam (Laiza) ni lu mat wa sai re lam chye lu ai.

Du Kaba Nban La Awng kawn ta masat ka ya nga yang

Du Kaba Nban La Awng kawn mungga shaga nga yang

Kumhpa Shagrau hpawng sumla ni

Mahkawn yungwi hte Golf ginsup ninghkring ni hpe shangwi shapyaw nga yang

Golf ginsup ninghkring ni rau sha man hkrum lu sha