49 NING HPRING K.I.O MASAT NINGHTOI MUNG SHAWA ZUPHPAWNG GALAW

Mungchying Magam Dap Komiti Tingnyang Up Salang Tsinyu Hkun Nawng kaw nna KIO masat ninghtoi mungga hpe hti ndau nga yang

Knet; 2009 ning October 25 ya.

Wunpawng Mungdan Shanglawt Hpung (KIO) hpaw hpang ai 49 ning hpring masat ninghtoi mung shawa zuphpawng hpe, Wunpawng Mungdan Shanglawt Hpung Ninggawn Daju Komiti woi awn let jahpawt hkying 10:30Am aten  Laiza Muklum, Sinpraw Majoi Manau Gawk Nu hta galaw la lu sai lam hpe chye lu ai.

Zuphpawng hta Mungchying Magam Dap Komiti Shingtau Tingyang Up Salang Nhpang Naw Bu kawn zuphpawng hpuawn galaw ai rai nna, Mungchying Magam Dap Komiti Tingyang Up Salang Tsinyu Hkun Nawng kaw nna 49 ning hpring K.I.O masat ninghtoi mungga shaga mat wa ai.

Dai hta n-ga, matut nna (K.I.C) Amu Madu Salang Kaba Lama Gum Hpan kaw nna Wunpawng Amyu Sha ni hpa rai Rawt Malan wa ai lam, gahkyin gumdin nga ra ai lam ni hpe mungga hte shatsam dat ai lam chye lu ai.

Ninggawn Daju Komiti woi awn let K.I.O Masat Ninghtoi hpe madi shadaw ai hku nna, October 20 kawn 25 ya shani du hkra (Num/La) Gawdin ginsup shingjawng lamang, October 23 ya kawn 24 ya shani du hkra Golf ginsup shingjawng lamang hte dai ni mung Sak kung hte Ma kaji ni a matu ginsup hpan hkum hkra shingjawng lamang ni hpe galaw wa sai lam chye lu ai.

Dai hta n-ga Ninggawn Daju Komiti woi awn ai a kata, Kadaw Bum, Lai Sin Bum, Hpalap Bum, Laiza hte  Woi Chyai Bum ni hta KIO Masat Ninghtoi hpawng lamang ni galaw la lu sai lam chye lu ai.

Mungdan mahkawn hpe rau jawm hkawn nga yang (du sa ai shawa yawng marai 400 jan)

Ma kaji ni a matu kagat shingjawng lamang galaw ya

Myit Pat let masat shara hpe maram gayet hkra ra ai ginsup hpan

hpung langai hte langai sumri gang n gun shingjawng nga yang