(47) lang na Sama Ginwang Hkalup Hpung Ginjaw Uphkang Kasa Zuphpawng hte (9) lang na Hpung Shawa Zuphpawng ngut sai

Knet; 2009 ning November 2 ya.

Nawng E Hku hkalup hpung jawng wang hta 2009 ning October 28 ya shani kaw nna galaw hpang ai (47) lang na Sama Ginwang Hkalup Hpung Ginjaw Uphkang Kasa Zuphpawng hte (9) lang na Hpung Shawa Zuphpawng gaw dai ni ngut sai lam chye lu ai.

Zuphpawng hta sa du lawm ai Kasa yawng 183 rai nna, zuphpawng e daw dan mat wa ai hta SHG a ningbaw lit hpe Rev. Qid Nang Dau Gyung, Ningtau Ningbaw lit hpe Rev. Gumtsan Naw Ra, Amu Madu lit hpe Rev. Nhkum Naw Bawk ni shatsam hkrum sai rai nga ai. Zuphpawng hta daw dan shatsam dat sai magam gun ni gaw magam gun ladaw 2010 ning kawn 2013 ning du hkra magam gun sa wa ra na lam chye lu ai.

Matut nna ndai zuphpawng hta Sari lu Hpung Up marai 3 hte Hpungtau marai 14 tang tawn sai lam, Ginwang kata buga hpung (3) hpe mung hpaw jat dat sai lam, Sama Ginwang Hkalup Hpung Ginjaw kata hpung magam dap yawng 12 nga ai rai nna dai magam dap ni a hpu awn marai 12 hpe mung lata san dat sai rai nga ai.

Sama Ginwang kata buga hpung yawng (22) rai nga sai hte Sama Ginwang Hkalup Hpung Ginjaw Uphkang kasa zuphpawng hpe laning mi hta kalang galaw nga ai lam, du na (48) lang na SHG zuphpawng hpe Katsu buga hta galaw sa mat wa na re lam chye lu ai.